Expectativa pa e di dos dia tawata hopi halto despues di un prome dia hopi exitante di torneo di Taekwondo. Trempan delegashon di Hulanda, Atiyas y Aruba tawata presente na Compleho Deportivo Betico Croes pa prepara pa loke ta di bira un anochi di torneo hopi interesante. Atletanan tawata pasa over di nan tecnicanan, debido stretch y calentamento.   Prome pelea di e torneo ta entre Dalean Halley di Antiyas y John Jairo di Aruba den categoria masculino Light te 59kg. Den prome asalto Antiyas ta sa di anota punto riba Aruba pero Aruba ta anota bek cu un contra atake relempago riba e Atiyano. Prome  asalto ta caba 2-2. Di dos asalto ta bira uno cu hopi accion. Aruba ta tuma ventaha di 5-3 riba Antiyas den e asalto aki. Di tres asalto ta drenta caminda cu Antiyas tin cu anota punto pa por jega Aruba, pero tecnicamente Aruba ta hopi bon prepara y di tres asalto ta termina 8-4 na favor di Aruba.   Di dos pelea ta entre Sane van den Dungen di Hulanda y Sharlean Damiana di Anityas den categoria femenino Light te cu 52 kg. Prome asalto ta uno hopi explosivo di parti di Hulanda caminda Hulanda ta anota dos punto riba Antiyas. Di dos asalto asalto ta termina 5-0 den favor di Hulanda, caminda Hulanda constantemente ta den atake riba Antiyas. Den di tres asalto Hulanda ta contra ataka Antiyas cu un back-kick den boca di stoma, cual atake ta manda Antiyas vloer sin rosea, terminando e pelea pa tko.   Di tres pelea di anochi ta entre Jonathan Samuel di Antiyas y Nigel Ras di Aruba den categoria masculino Welter te cu 63 kg. Aruba hopi calmo y focused ta tuma ventaha riba Antiyas pa termina e prome asalto 3-1. Di dos asalto tawata uno cu hopi accion caminda Aruba y Antiyas ta bataya otro pa logra mas punto possibel. Despues di dos asalto Aruba tin e ventaha di 6-4 riba Antiyas.  Den di tres asalto CDBC ta bay riba su cabes ora cu Aruba ta koy bentaha di 11-5 riba Antiyas cu accionnan relempago y skopnan bon poni, esaki ta bira e score final tambe.   Di cuater pelea ta entre Denise Fernando di Antiyas y Alisson Dirksz di Aruba den categoria femenino Heavy te cu 68kg. Antiyas ta anota dos punto den e prome asalto y ta domina Aruba durante e asalto aki cual ta keda na 2-0. Den di dos asalto ta mane cu Antiyas ta hanja e debilidad di Aruba y ta anota punto tras di punto y di dos asalto ta caba 4-0 pa Antiyas. Di tres asalto ta Antiyas ta koy ventaha riba Aruba cu 7-0. Aruba ta logra anota su prome punto den e asalto aki, pero Antiyas ta demonstra di ta simplemente hopi mas fuerte cu Aruba y pelea ta termina 8-1 na fabor di Anityas.      Di 5 y ultimo pelea di anochi ta entre Taino Cijntje di Antiyas y Raymond Rasmijn di Aruba den categoria masculino Light weight te 68 kg. Prome asalto ta uno hopi explosivo caminda tur dos atleta ta ataka agresivamente y cu hopi presishon. Den e atake Aruba baha su guard caminda Antiyas ta score bon cu un swing kick pa cabes, terminando asinaki e prome aslato 5-1 na favor di Antiyas. Di dos asalto ta bira uno mesun exitante cu e prome y tur dos atleta ta score terminando e asalto aki na 6-3 pa Antiyas. Asalto tres ta cuminsa cu hopi accion y Aruba mester traha hopi duro pa logra keda den e pelea pero Antiyas ta resulta superios y ta sa di anota mas punto terminando e asalto aki 10-7.