Seleccion di atletismo cu ta participa den Weganan di Reino a mira accion diamars anochi den Compleho Deportivo Guillermo Prospero Trinidad na Dakota cu tribunanan yen di fanatico pa apoya e atletanan. Tur atleta a duna lo maximo di nan mes y a brinda e publico un tremendo espectaculo pa mira.  100 m Sprint-Mucha Muher E prome competencia tabata e careda di 100 m sprint mucha muher, na cual a participa Suyanne Richardson di Antiyas Hulandes den baan 1, Ginella Albertus di Aruba den baan 2, Robin Wingebermuhle di Hulanda den baan 3, Dyanne Ortega di Aruba den baan 4, Shamila Daal di Antiyas Hulandes den baan 5, mientras cu Iris van Daalen di Hulanda a ocupa baan 6. E careda aki a resulta den un ‘finish’ hopi preta. Na di tres lugar y ta ricibi medaya di brons a keda e atleta hulandes Iris van Daalen cu a core e 100 m sprint den 12:65 seconde. Segundo lugar y medaya di plata a bay pa e atleta Suyanne Richardson di Antiyas Hulandes cu un tempo di 12:49 seconde. Y e atleta cu ta logra medaya di oro den 100 m sprint ta Shamila Daal di Antiyas Hulandes cu a termina e careda den 12:41 seconde.  100 m Sprint-Mucha Homber Siguiente competencia tabata e careda di 100 m sprint mucha homber, cu atleta Giorgan van Lamoen di Antiyas Hulandes den baan 1, Jursley Armantrading di Aruba den baan 2, Jonathan Mutebwa di Hulanda den baan 3, Michael Geerman di Aruba den baan 4, Hensley Paulina di Antiyas Hulandes den baan 5 y Christiaan Meilink di Hulanda den baan 6. Despues cu e careda a tuma lugar, hueznan a declara e careda nulo y mester a ser cori di nobo. E careda aki automaticamente a ser cori mas laat mes anochi y cada atleta ariba menciona a ocupa e baan igualmente asigna pa nan. Resultado di e careda aki a keda: Jonathan Mutebwa di Hulanda na di tres lugar pa medaya di brons cu e tempo di 11:13 seconde. Na di dos lugar y ta ricibi medaya di plata e atleta Christiaan Meilink di Hulanda cu e tempo di 11:11 seconde, mientras cu Antiyas Hulandes representa pa e atleta Hensley Paulina ta logra medaya di oro cu un tempo di 10:94 seconde.  400 m – Mucha Muher E competencia di e diferente disciplina cu a sigui a bay practicamente lihe un tras di otro. Pa e careda di 400 m mucha muher, Antiyas Hulandes su atleta Joanne Florentina a ocupa baan 1, Charlene Leslie di Aruba den baan 2, Maureen Rots di Hulanda den baan 3, Denisha Thielman di Aruba den baan 4, Emmy Fraenk di Antiyas Hulandes den baan 5 y den baan 6 a core e atleta di Hulanda Mediea Ghafoor. E careda aki a resulta dramatico na final. Na prome lugar pa medaya di oro a resulta e atleta Emmy Fraenk di Antiyas Hulandes cu a termina cu un tempo di 55:69 seconde. Na di dos lugar cu medaya di plata ta keda e atleta hulandes Mediea Ghafoor cu un tempo di 57:66 seconde. Pa e di tres lugar y medaya di brons, tur indicacion tabata cu e atleta hulandes Maureen Rots lo a logra esaki. Pero lamentablemente e atleta aki ta haya un caida algun meter prome cu ‘finish line’, e ta lanta y sigui core, pero  e atleta di Aruba Denisha Thielman cu tabata ey mes su tras a duna tur loke e tabatin e momento ey y ta logra finalisa e careda na di tres lugar cu un tempo di 1:03 minuut y 21 seconde. Aruba ta logra medaya di brons den e categoria aki.   400 m – Mucha Homber Den e competencia di 400 m a participa siguiente atletanan: Den baan 1 Daniel Manuel di Antiyas Hulandes, den baan 2 Johan Fernandez di Aruba, den baan 3 Stijn van Opstal di Hulanda, den baan 4 Bernard Geerman di Aruba, den baan 5 Rayen Rojer di Antiyas Hulandes y den baan 6 Stefan de Vries di Hulanda. Den e disciplina aki a keda na di tres lugar Daniel Manuel di Antiyas Hulandes cu un tempo di 50:59 y ta logra medaya di brons. Na di dos lugar ta keda Stefan de Vries di Hulanda cu un tempo di 50:48 y ta haya medaya di plata. E prome lugar a bay pa Rayen Rojer di Antiyas Hulandes cu ta finalisa e careda cu un tempo di 50:15 y ta bay cu e medaya di oro.  ‘Hoogspringen’- Mucha Homber Den e disciplina di bulamento halto a representa Aruba e atletanan Michael Geerman y Xavier Boekhoudt. Pa Antiyas Hulandes tabata Winsley Tweeboom y Quentin Siberie y pa Hulanda e atletanan Jasper Heesbeen y Roy Spijkerman. E disciplina aki e publico a sigui’e di distancia y na final a clasifica pa medaya na di tres lugar e atleta di Antiyas Hulandes Winsley Tweeboom cu a bula 1 meter 83 y ta logra medaya di brons. Na di dos lugar a keda e otro atleta di Antiyas Hulandes Quentin Siberie cu a bula1 meter 98 y ta logra su medaya di plata. Na prome lugar ta keda e atleta di Hulanda Jasper Heesbeen cu a bula 2 meter 01 y ta logra medaya di oro den e disciplina aki.  ‘Verspringen’- Mucha Muher Pa e disciplina di bula leu tabata e atletanan Charlene Leslie y Rachelle Henriquez cu a representa Aruba. Pa Hulanda tabata e atletanan Robin Wingebermuhle y Louise Taatgen, mientras cu pa Antiyas Hulandes tabata e atletanan Shamila Daal y Juheely Wilsoe. Den e disciplina aki a keda na di tres lugar Charlene Leslie di Aruba cu a bula un distancia di 4 meter 90 y e ta logra medaya di brons pa Aruba. Na di dos lugar ta keda Louise Taatgen cu ta bula e distancia di 5 meter y ta logra medaya di plata pa Hulanda. Y den bulamento leu ta keda na prome lugar e atleta Shamila Daal cu un distancia di 5 meter 31 y ta logra medaya di oro pa Antiyas Hulandes.  Careda di 1500 m – Mucha Muher Pa e careda di 1500 m den mucha muher a representa Aruba Jennelaine Vrolijk y Annelaine Jacobs. Pa Antiyas Hulandes a core Vanessa Philbert y pa Hulanda a core Irene van Lieshout y Juul Lavrijsen. A clasifica na di tres lugar Vanessa Philbert di Antiyas Hulandes cu un tempo di 5:13:96 y ta logra medaya di brons. Na di dos lugar a keda e hulandes Juul Lavrijsen cu un tempo di 4:49:23 cu tabata bon pa e ricibi su medaya di plata. Y finalmente ta keda na prome lugar Irene van Lieshout di Hulanda cu a core e 1500 m den un tempo di 4:46:39 y ta logra medaya di oro.    Careda di 1500 m – Mucha Homber E mucha hombernan cu a representa Aruba den e careda di 1500 m tabata Kevin Rojer y William Lacle, mientras cu pa Antiyas Hulandes a core Benjamin Manuel y Giorgan van Lamoen y pa Hulanda tabata Jeroen van Calker y Niek den Exter. Esaki a resulta un careda hopi emocionante. Apesar cu e dos atleta hulandes a saca bentaha for di demas atleta, e lucha tabata pa e di tres lugar entre e coredo Kevin Rojer di Aruba y Benjamin Manuel di Antiyas Hulandes. Finalmente ta logra e di tres lugar Benjamin Manuel cu ta finalisa e careda cu un tempo di 4:34:24 y ta ricibi medaya di brons pa Antiyas Hulandes. Na di dos lugar ta keda Niek den Exter di Hulanda cu a core un tempo di 4:20:49 y ta haya medaya di plata pa Hulanda y na prome lugar ta keda Jeroen van Calker cu ta termina e careda den un tempo di 4:13:62 y ta logra medaya di oro pa Hulanda.  ‘Relay 4 x 100 m’ – Mucha Muher y Mucha Homber E ultimo careda di e anochi tabata e careda di estafeta 4x100 m. E disciplina aki a premia solamente e di dos y prome lugar. E careda di mucha muhernan a keda na di dos lugar y ta ricibi medaya di plata e atletanan di Hulanda cu a core e ‘relay’ den un tempo di 49:09. Mientras cu e atletanan di Antiyas Hulandes ta logra e prome lugar y ta ricibi e medaya di oro pa un tempo cori di 48:78. E careda ‘relay’ pa mucha hombernan a keda na di dos lugar Hulanda y na prome lugar ta keda Antiyas Hulandes cu a termina e careda cu un tempo di 42:57. Pues plata pa Hulanda y oro pa Antiyas Hulandes.   ‘Kogelstoten’ E disciplina di ‘kogelstoten’ tambe a mira accion diamars anochi pero resultadonan di esaki ta keda anuncia diahuebs anochi hunto cu entregamento di medaya.    Diahuebs 30 di juli 2009, seleccion di atletismo tanto di Aruba, Hulanda y Antiyas Hulandes ta bolbe mira accion den Compleho Deportivo Guillermo Prospero Trinidad pa 7:30 pm. Tin competencia di entre otro careda di 800 m, verspringen, hoogspringen y zweedse estafette.   Pueblo di Aruba ta keda cordialmente invita pa bin apoya nos seleccionnan di atletismo cu tin otro gran reto nan dilanti. Entrada ta dos florin pa adulto y un florin pa mucha. Pa mas potret por click ariba nos seccion di Gallery y admira esakinan