Diaranzon atardi e deporte di taekwondo den e Weganan di Reino 2009 a inicia den compleho deportivo Betico Croes na Sta Cruz. Ya for di e prome peleanan caba nos por a ripara cu e seleccion di Hulanda ta mucho mas superior na esnan di Antiyas Hulandes y Aruba. Loke a acapara e atencion di publico y a nos di prensa, ta e forma spectacular di bringa di e dos rumannan Giorgio y Joshua Janmaat di Hulanda. Ya for di e prome combate, por a mira cu nan estilo ta uno diferente y super lihe, cu movecionnan cu masha tiki a nos yega di experiencia aki na Aruba. Pa e motibo aki nan a haya e apodo cerca e miembronan di prensa presente como 'The Matrix Brothers', nan movecionnan di pia ta manera cana den laira, increibel pa mira. Mester bisa cu dado momento tur presente a haya un susto formal, ora cu Joshua Janmaat a enfrenta e peleador local Meldrick Boekhoudt, na unda cu Joshua cu un side-kick basta duro ta knockout Meldrick te mande for di tino(mira e foto adhunto). E intervencion rapido di dokternan presente a yuda e alivia e situacion, na unda a yama ambulance mesora. E dos rumannan aki ta dos prospecto grandi den e deporte di taekwondo na Hulanda, nos a bin compronde cu nan tin varios anja ta praktica e deporte di taekwondo cu hopi amor, dedicion y disciplina. Ken sa kizas den futuro cercano nos lo tende mas di e dos rumannan Giorgio y Joshua Janmaat. Riba e combinacion di foto nos por aprecia algun imagen spectacular di e combatenan di e dos rumannan Janmaat.Pa mas potret check out nos seccion di Gallery