E encuentronan di futbol ta continua den Weganan di Reino 2009. Diaranson anochi den Compleho Deportivo Guillermo Prospero Trinidad a tuma lugar e wega di futbol entre seleccion di Hulanda contra e seleccion di Aruba. Pa exactamente 7:30 pm e arbitro principal di e wega, Edsel Dimie di Antiyas Hulandes a fluit pa inicio di e wega. Ambos tribuna yen di fanatico amante di bon futbol a bin pa apoya e hobennan. Seleccion hulandes a cuminsa cu atakenan for di inicio di e wega y a purba pa sorprende e seleccion di Aruba.Na minuut 5:41 riba un bon tiro di e delantero hulandes, nan ta purba habri e score pero e keeper di Aruba Samuel Koolman ta pomp e bala pafo. Na minuut 6:34 tabata turno di Aruba cu riba un bunita tiro por poco ta score e prome goal.  Durante e prome 12 minuutnan di wega seleccion di Aruba practicamente a domina riba tereno di bala. Na minuut 15:20 di e partido, riba un tremendo tiro di e delantero hulandes, nan ta purba score e goal pero e keeper di Aruba atento, un biaha mast a logra saca e bala afo. Riba un sake di corner, e ekipo hulandes pa descuido di defensa di e seleccion di Aruba, na minuut 16:14 di e prome tempo ta score e prome goal. Tabata e hungador nr. 9 Jair Balrak cu ta score e prome goal pa Hulanda.  E hobennan di Aruba ta keda firme, cu e meta pa tambe score un goal y tabata na minuut 17:55 di e prome tempo cu nr. 12 di Aruba, Darryl Nelson ta score un bunita goal pa empata e wega na uno. Despues di e goal di Aruba, awacero a menasa un rato pero asina mes e wega a continua. Hulanda tabata ataca y Aruba tabata defende. Den e wega aki por a mira un seleccion di Aruba diferente compara cu e wega cu Aruba a hunga contra di Antiyas Hulandes y a perde 1-0. Mientras cu e ekipo hulandes tambe tabata forma su wega diferente compara cu e wega cu nan a hunga contra di Antiyas Hulandes, cual wega Hulanda a gana 4-0. Prome cu half time a bay aden, tabatin varios atake riba goal di e seleccion hulandes, pero e keeper di Aruba a sa di wanta tur e tironan. Di ambos banda tabatin atakenan di menasa riba goal. E arbitro ta fluit pa half time y e wega ta keda 1-1.  Den e di dos tempo ambos seleccion a sali duro pa busca e goal di bay ariba. Den e di dos mita di wega ambos seleccion a haci cambio di hungador pa trece mas movecion den e wega. Na minuut 13:10 di e segundo tempo e seleccion di Hulanda ta score e goal di bay ariba y tabata e hungador nr. 6 Guytano Dos Santos cu ta haci esaki sorprendiendo e ekipo di Aruba totalmente.  Apesar cu awacero a bolbe cay den e di dos mita di wega, esaki no a strobe e wega di futbol cu a sigui den bon ritmo.E ekipo hulandes a ataca mas den e di dos tempo, demostrando cu nan kier gana e wega.  E seleccion di Aruba a hunga un bunita wega di futbol cu fanaticonan ta gusta mira, pero definitivamente otro goal no kier a cay. Hulanda a defende bon te na ultimo minuut di wega.  Na minuut 80 di wega, arbitro principal Edsel Dimie ta fluit pa e wega finalisa y e seleccion di Hulanda ta gana di e seleccion di Aruba cu e score di 2-1. Esaki ta pone cu e wega final di futbol cu ta tuma lugar diabierna 31 di juli 2009 ta entre e seleccion di Antiyas Hulandes y e seleccion di Hulanda. E wega aki ta tuma lugar den Compleho Deportivo Guillermo Prospero Trinidad y ta cuminsa pa 7:30 pm.   Pueblo di Aruba ta keda cordialmente invita pa bin presencia e partido final di futbol como tambe e ceremonia di clausura pa Weganan di Reino 2009. Entrada pa wega final aki ta 5 florin pa adulto y 3 florin pa mucha. Pa mas potret di futbol por click ariba nos seccion di Gallery y admira esakinan