E segundo anochi di competencia na Savaneta ta sigui duna bon resultado pa e selección di landamento di Aruba. Particularmente e hoben Jordy Groters a logra gana varios di su eventonan. Dialuna anochi caba ela termina na prome lugar den tur e tres eventonan individual den cua ela competi. Diamars Jordy a termina na prome puesto un biaha mas den dos evento individual, mehorando te hasta recordnan nacional den e 200 meter Freestyle y 100 meter Backstroke. Un biaha so e mester a permiti un landador Hulandes yega prome cu ne, cu tabata Niels Kemperink den 100 meter Backstroke. Loke sin duda tabata e “highlight” di e anochi tabata e dos eventonan di relevo,  caminda cuater landador ta combina pa landa contra e equiponan di e otro paisnan. Ayeranochi a toca turno na e 400 meter Freestyle Relay, caminda cada un di e landadornan a landa un distancia di 100 meter. Den e categoría di 11-12 aña di edad e equipo Hulandes tabata tin un bentahe bastante grandi riba e equipo di Aruba pa e parti grandi di e evento, pero nan no por a imagina cu Jordy Groters, biniendo for di leu a logra elimina e distancia cu tabata tin y finalmente a logra gana e equipo Hulandes na un forma masha spectacular!! E equipo Arubano tabata consisti di Daniella van den Berg, Sue Gin Arends, Renze Postma y Jordy Groters. Tambe den e categoría di edad 15-16 aña, caminda no tin competidornan Hulandes y e competencia ta bai entre Aruba y Antiyas so, e equipo local a logra elimina un desbentaha cu tabata tin cu e equipo Antiyano, ganando e oro finalmente pa mas cu un seconde. Integrantenan di e equipo di relevo aki tabata Tiziana La Torre, Marellys Robles de Medina, Joey Ponson y Derek Groters. Otro resultadonan di e segundo anochi tabata entre otro Jemal Le Grand (prome puesto  den 200 meter Freestyle), Marellys Robles de Medina (prome puesto den 200 meter Freestyle), Derek Groters (prome den 200 meter Freestyle). Mester menciona cu Daniella van den Berg, Renze Postma, Tiziana La Torre, Jemal Le Grand, Marellys Robles de Medina, Derek Groters, Sue Gin Arends, Jordy Groters, y e equipo di relevo den 13-14 aña a logra termina na segundo puesto den nan eventonan.   E competencianan ta continua diaranson y diahuebs anochi cu e programa combina, cu ta contene landamento y landamento sincroniza. Ora di inicio ta 6 or di atardi y tur competencia ta tuma lugar na “Piscina Olímpico Roly Bisslik”.