Compitiendo contra 27 atleta di Hulanda, Antiyas y Aruba, Anouk Eman ta sigui competi bon y ta termina na segundo lugar den e competencia di synchro. Diamars a toca turno na e sesión di figuranan técnico, cu ta forma 50% di e puntuación total den e deporte di landamento sincroniza. E ta un parti importante, pero tradicionalmente e “tendón di aquiles” di e selección Arubano y esey a keda confirma un biaha mas. Hulanda a sa di domina e figuranan técnico, posicionando atletanan den e prome 10 puestonan. Solamente Anouk Eman y Kristen Eman a sa di penetra den e top, Anouk terminando na segundo lugar y Kristen na un bunita sexto puesto. Antiyas ta ocupa e ultimo puestonan di e lista. Cu e resultado aki Anouk Eman ta logra gana e prome medalla di e Weganan di Reino pa synchro, esta un medaya di plata pa Aruba. E equipo Arubano a keda sumamente contento cu e resultado aki y ta cla pa enfrenta nan contrincantenan den e sesionnan di rutina liber, cu ta un presentación riba música. Diaranson anochi lo tin e sesión preliminar di dueto, caminda cada un di e tres paisnan ta competi cu tres dueto. Na final ta selecta e tres mihor duetnan (un di Hulanda, un di Antiyas y un di Aruba), cu lo competi den e sesión final di duet riba diahuebs anochi. Riba e mesun diaranson anochi lo tin e finalnan di solo,  caminda Anouk de Graaf (Hulanda), Daniela Diaz (Antiyas Hulandes) y Anouk Eman (Aruba) ta baya pa e medayanan den e evento aki. Diahuebs anochi lo tin e sesión final di duet y tambe e culminación di e campeonato, esta e equipo, caminda ocho atleta ta combina pa duna un presentación riba música.