Hulanda ta soprende tur hende ora cu den e di 12 inning nan ta bin bek y gana di Antiyas Hulandes cu e score di 8 - 7, den un di e weganan di baseball mas largo den e era nobo di Weganan di Reino. Un partido caminda ambos equipo a sa usa no menos cu tres pitcher pa asina trata na seya e victoria. Atntiyas Hulandes a cuminsa bon anotando 4 careda, pero poco poco e hulandesnan a bini bon bek den wega y ta empata y bai ariba. Den di 12 inning cu un bunita squeeze play, Hulanda ta laga Antiyas den tereno y asina bai cu nan prome victoria den baseball. E hungador Jeremy Angela sigur tabata un di e hombernan grandi ariba tereno, el a wanta e temible bateadoran di Antiyas cu su pitcheo y a percura pa un bataso di cuater skina pa empuha un par di careda pa Hulanda, den e wega aki Jeremy Angela ta resulta e pitcher ganador. Encambio Antiyas Hulandes a luci bon na bate, pero no a probecha di e momentonan oportuno y ta laga hopi hende na base. Pa loke ta e bateo di Antiyas Hulandes, e hungadornan Roderick Bernadina y Christefer Obispo ta dal un homerun pa nan equipo. E statisticanan ta Antiyas Hulandes cu 7 careda 10 hit(6 hit, 2 doblete y 2 HR), e equipo di Hulanda 8 careda, 9 hit(7it, 2HR). Pitcher ganador a bira Jeremy Angela y es cu a bai cu e derota tabata Hendrick Kinburn. Pues Antiyas Hulandes ta conoce su segundo derota den baseball y tin cu enfrenta Aruba awe pa 19.30 na Dragon Hitters Ballpark.