IDEFRE a continua cu competencia di futbol escolar den categoria A-mucha homber, despues cu for di december aña pasa e clasificadonan segun sector tabata conosi. A parti e schoolnan den 2 poule pa hunga e weganan cu a tuma lugar riba cancha di Centro Deportivo Frans Figaroa na Noord. Poule A y Poule B: E schoolnan cu a forma poule A tabata: Mon Plaisir School, Maria Goretti School, Commandeur Pieter Boer School y Scol Basico Washington. Mientras cu den poule B tabata tin: Colegio Conrado Coronel, Colegio Sagrado Curason, Maria Regina School y St. Dominicus College. Resultado di weganan: E weganan a cuminsa riba dialuna dia 16 di januari 2012 y e resultadonan ta como lo siguiente: Scol Basico Washington ta gana Commandeur Pieter Boer School cu anotacion di 1 pa 0. Mon Plaisir School ta perde 3-0 contra di Maria Goretti School. St. Dominicus College ta domina Maria Regina School cu anotacion di 4 pa 0. Colegio Sagrado Curason ta mustra superior riba Colegio Conrado Coronel y ta gana 3 pa 0. E wega entre Scol Basico Washington y Maria Goretti School ta keda empata na 1 gol. Mientras cu Mon Plaisir School ta gana Commandeur Pieter Boer School cu anotacion di 2 pa 0. Diamars 17 di januari 2012 weganan a sigui y e prome wega tabata entre St. Dominicus College y Colegio Sagrado Curason cu ta keda empata na 0 gol. Despues e muchanan di Colegio Conrado Coronel ta subi veld brabo y ta golea Mara Regina School 5 pa 0. Scol Basico Washington ta logra otro victoria di 1 pa 0 contra di Mon Plaisir School. Y den otro wega di hopi gol, Maria Goretti School ta gana cu anotacion di 5 pa 0 contra di Commandeur Pieter Boer School. Mientras cu den e wega cu a sigui e muchanan di St. Dominicus College ta cai venci contra di Colegio Conrado Coronel cu anotacion di 3 gol contra 0. Den e ultimo wega Colegio Sagrado Curason a sali sigur pa gana y ta golea Maria Regina School 5-0. Final Nacional Futbol A-mucha homber:   Despues di e weganan semi-final a pasa pa final e 4 school pa mira cua ta titula campeon escolar den categoria A. Den e prome wega cu a tuma lugar diaranson 18 di januari 2012 a hunga Maria Goretti School contra di Colegio Conrado Coronel. Den un wega fuerte bataya pa ambos school, na final ta gana Colegio Conrado Coronel cu anotacion di 3 gol contra 1 di Maria Goretti School. Asina e hobennan di Colegio Conrado Coronel ta gana e pase pa hunga e wega pa campeon. Den e siguiente wega a hunga Scol Basico Washington y Colegio Sagrado Curason. E wega aki tabata duro, cu ambos school yen di animo pa gana. Pero na final, e hobennan di Scol Basico Washington ta gana cu score di 2 gol contra 0, pa asina hunga e wega final pa campeon. E wega pa e di tres y di cuater lugar a keda hunga entre Maria Goretti School y Colegio Sagrado Curason. Na final ta e muchanan di Colegio Sagrado Curason ta gana cu anotacion di 3 gol contra 0 y asina ta termina na di tres lugar di e competencia di futbol escolar. School Campeon: E ultimo wega di campeonato escolar di futbol categoria A-mucha homber organisa pa IDEFRE a keda hunga entre Colegio Conrado Coronel y Scol Basico Washington, cu a resulta den un tremendo wega na unda cu ambos school a demostra bunita wega di futbol y na final Scol Basico Washington ta gana cu anotacion di 1 gol contra 0 di Colegio Conrado Coronel. Asina Scol Basico Washington ta bira e school cu ta titula campeon y Colegio Conrado Coronel ta keda na di dos lugar. Tur school ta ricibi nan bunita trofeo, mientras cu e muchanan ta haya nan medaya pa conmemora e weganan y sigur nan clasificacion final. E muchanan di Scol Basico Washington fuerte e ultimo añanan ganando e titulo aki, un biaha mas ta haya oportunidad pa representa Aruba den e ‘Weganan Interinsular’ cu e aña aki, pa loke ta e deporte di futbol ta tuma lugar na Aruba mes. Esaki ta hasi posibel como pais organisador, e di dos lugar tambe ta hunga dunando Colegio Conrado Coronel asina e honor tambe pa representa Aruba. IDEFRE ta gradici tur school cu un biaha mas a participa y hasi e competencia di futbol den categoria A-mucha homber grandi. Alabes ta invita e schoolnan pa sigui practica y duna bon bataya y bunita wega di futbol den e ‘Weganan Interinsular 2012’ cu ta tuma lugar e fin di siman di 27 pa 29 di april 2012.