McDonald’s lo ta parti di e Movimento Olimpico por lo menos te cu e Weganan di 2020 cu renobacion di su patrocinio mundial. E compania, basa na Merca, y Comite Olimpico Internacional (IOC) a firma e renobacion di e patrocinio diabierna na Innsbruck, na vispera di e prome Weganan Olimpico Hubenil.  Mientras cu e detayenan financiero di e contrato no a wordo divulga, e patrocinio tin un balor di US$ 200 miyon y ta duna McDonald’s e derecho di ta sponsor pa e Weganan di Sochi 2014, Rio 2016, PyeongChang 2018 y pa e Weganan di 2020 (pa cua e sede ainda no a wordo eligi).  Presidente di IOC a bisa cu e patrocinio nobo lo no trece cambio, yamando e “e continuacion di un partnership importante.” Presidente y CEO di McDonald’s Don Thompson a bisa cu e compania lo usa su patrocinio pa aumenta su actividadnan na nivel local. Na mes momento Thompson ta anticipa riba e Weganan Olimpico di London, caminda e compania lo opera su restaurantnan di mas grandi den historia durante Weganan Olimpico. E ta bisa cu 2.000 staff di  McDonald’s di rond mundo y Gran Bretania lo wordo selecta pa traha den e restaurantnan.  Un di nan lo ta situa den e Villa Olimpico, un otro operando 24 ora pa dia, ta wordo poni den e Main Press Center, mientras cu dos otro lo ta habri pa publico den e Olympic Park. Un di nan lo ta e McDonald’s mas grandi di mundo.  “Como e Restaurant Oficial di e Weganan Olimpico, nos ta masha orguyoso di por alimenta e atletanan y bishitantenan di rond mundo, y ta excita di por hunga un rol den hasi Weganan Olimpico posibel,” ela bisa. “Kedando den e linea di e compromiso di McDonald’s cu bienestar di muchanan, nos lo sigui comunica cu mucha tocante e importancia di come saludabel y un estilo di bida activo a traves di su partnership cu e Weganan Olimpico.” McDonald’s tin un relacion largo cu e Weganan Olimpico, sirbiendo como sponsor desde 1976. “Nos ta masha contento cu McDonald’s ta anunciando su renobacion di su contrato cu IOC, fortificando nos trabou pa mas cu 35 aña,” Presidente di IOC Jacques Rogge a bisa. “McDonald’s ta provee un coneccion positivo y inspiracional cu e espirito Olimpico, compartiendo e balornan Olimpic cu su clientenan rond mundo.” McDonald’s ta uni cu Coca-Cola, Dow Chemical, Omega, Procter & Gamble y Visa como sponsor mundial di IOC pa e periodo cu ta cubri te na e Weganan di 2020. Oficialnan di marketing di IOC ta bisa cu nan kier hasi algun cambio den e programa TOP despues di 2020.