Cu e actividad di CICLOVIA, comunidad ta haya e oportunidad pa move libremente riba e ruta specifico den bario di Savaneta diasabra awor dia 11 di september 2010. E dia aki,  tur persona cu ta gusta ehercita pa medio di canamento por disfruta di e oportunidad cu ta keda ofreci.  Ta conoci cu tin hopi hende cu ta gusta participa na caminatanan cu ta keda organisa pa diferente instancia. Canadonan ta probecha di e momentonan aki pa motibo cu nan por move libremente y cu siguridad riba caminda. Hustamente cu e actividad di Ciclovia, tur canado ta haya e facilidad pa practica nan tecnica di canamento den un circuito cera sin wordo stroba door di trafico di motor. Alabes, tur canado cu ta cana pa haci movecion y mantene nan condicion y salud tambe por move trankil.   Diasabra awor, durante e actividad di Ciclovia na Savaneta tur canado ta keda cordialmente invita pa bin y participa. Ya for di 5’or di atardi tur persona cu ta gusta cana y haci movecion por probecha di e oportunidad unico cu Ciclovia ta brinda na canadonan.