Bou di e titulo “E preparacion mental den deporte”, Lic. Edmundo Josiah a publica un buki cu ta esencial pa tur esnan cu ta participa activamente den deporte. Sea cu bo ta un atleta, un entrenador, un tecnico, un dirigente of un mayor, e preparacion mental den deporte ta un area sumamente importante cu por hasi é diferencia den cualquier deporte. E buki ademas ta den e idioma Papiamento, loke ta hasie mas facil pa compronde pa un y tur.  Edmundo Josiah ta psicologo di profesion y ta specializa den psicologia deportivo. Considera como un di e fundadornan di psicologia deportivo den su pais natal Cuba, Edmundo tin casi cuatro decada di experiencia como psicologo den deporte. Su labor mas conoci ta e trabou durante ocho aña cu e seleccion nacional di boxeo di Cuba, caminda ela colabora cu e preparacion mental di mas cu 20 campeon Panamericano, Mundial y Olimpico, entre nan a destaca e Triple Campeon Olimpico y Mundial, Teofilo Stevenson. Pa e ultimo diestres aña Edmundo ta yama Aruba su cas, caminda e ta traha pa Comite Olimpico Arubano, actualmente den e funcion di Director Tecnico y psicologo pa e atletanan cu ta forma parti di e seleccion di COA.  E buki “E preparacion mental den deporte” ta contene diferente topico sumamente interesante. Temanan cu ta wordo presenta ta entre otro: kiko ta preparacion mental di deporte?; e ansiedad pre-competitivo; adolescencia y rendimento deportivo; con pa enfrenta frustracionnan den deporte?; e comunicacion entrenador-atleta; e relacion sexual den bida di e deportistanan. Un total di 10 capitulo ta trata e temanan aki y algun otro mas cu sigur ta bale la pena pa lesa.  Esnan cu ta interesa pa cumpra e buki aki tocante psicologia den deporte, por pasa na e clinica di Lic. Edmundo Josiah, situa na e segundo piso di Botica Kibrahacha den Havenstraat, den siman durante oranan di 14.00-18.00 or. Por tuma contacto tambe telefonicamente cu e oficina na number 583-0036.  Gradiciendo cada un di nan pa nan apoyo pa por a realisa e proyecto aki, Edmundo Josiah a hasi entrega di e prome bukinan na Su Excelencia Ministro di Deporte, Dr. Richard Visser, y na dirigentenan di institucionnan deportivo di nos pais manera Presidente di Comite Olimpico Arubano, Roy Mezas; Secretaria General di COA y Miembro di Comite Olimpico Internacional, Nicole Hoevertsz; Director di IDEFRE, Jessy Beukenboom; y Secretario di Comision di Subsidio pa Deporte, Jerry Gomes. Su compañeronan di COA, e staff profesional, consistiendo di Chu Halabi (Presidente di Comision Tecnico) y Robbie Falconi (Director di Desaroyo) tambe a ricibi un ehemplar di e buki for di man di Edmundo.  COA ta felicita Edmundo Josiah profundamente cu e publicacion aki, cu ta un logro grandi pa deporte di nos pais. Un buki tocante psicologia di deporte y scirbi na Papiamento! Busca bo ehemplar di e buki, pa asina bo tambe por beneficia di tur loke e tin pa ofrece na informacion valioso.