Nos atletanan ta mirando accion na Mayagüez, durante e Weganan Centro Americano y del Caribe (CAC). Den e dianan tras di lomba e competencia di  atletanan femenino den e categoría 58 kilogram a tuma lugar den e “Coliseo Juan Sanchez Acevedo” na e cuidad di Moca, den vecindario di Mayagüez. E competencia a cuminsa den oranan di atardi, caminda un sala yen di fanaticonan di e Weganan CAC tabata presente. Den e categoria di 58 kilogram tabata tin 8 hisador femenino. E paisnan cu a participa tabata Aruba, 2 atleta di Colombia, 1 di Republica Dominicana,1 di El Salvador, 1 di Mexico, 1 di Nicaragua y 1di e pais sede Puerto Rico. Jennifer a termina na di 7 lugar cu un total 130 kg. Jennifer a purba di kibra su record cu cuatro kilo, pero no a logra esaki. Den e evento “Snatch” Jennifer a finalisa hisando 55 kilogram, caminda ela hasi dos intento pa hisa 62 kilogram. Den e Segundo parti di e competencia, den e “Clean & Jerk” Jennifer a finalisa cu 75 kg unda cu ela purba aki tambe pa hisa 81 kg, pero pa motibo tecnico unda un referee a duna Jennifer dos lus cora e no a logra e hisada. Combinando e total di kilonan hisa, Jennifer a termina cu 130 kilogram. E competencia tawata hopi fuerte. Finalmente e atleta Jackelina Heredia di Colombia a finalisa cu un total 210 kg ganando asina e medaya di oro. Na di dos lugar a termina e atleta Geralee Vega di Puerto Rico, cu a finalisa cu un total di 205 kg pa e medaya di plata. Na di tres lugar a termina e atleta Monica Dominguez cu un total di 203 kg pa medaya di brons.    Mester bisa cu nos por a mira nos atleta Jennifer Piter mas fuerte cu nunca, un atleta cu ta cuminsa competi pa puesto cu e paisnan grandi manera El Salvador y Nicaragua cu tin hopi mas experienca den e deporte aki. Pronto nos por spera cu e puestonan lo cuminsa mehora, di manera cu e experienca competitive tambe ta crece. Sigur tabata un competencia fuerte, pero nos ta sigur cu pa proximo campeonatonan internacional Aruba lo tin un mihor resultado cu mayor competencia pa e otro paisnan.