Diasabra atardi, Nadi Croes/Crismo Angela Ballpark a keda hopi chikito pa acomoda e miles di hendenan cu ya for di tempran a yega e stadion pa asina mira e gran final di baseball Latino Americano cu a bai entre e seleccionnan di Aruba 1 y Puerto Rico, ambos seleccion invicto te na e ultimo wega. E espectativa pa cu e wega aki tabata grandisimo, tur hende kier a forma parti di e momento historico aki. Un Aruba 1, sigur fuerte, pero enfrentando un adversario cu a keda peligroso durante di henter e torneo. Den e 1inning, Puerto Rico ta menasa y ta pone dos homber na base, pero Duinkerk a sali bon cu ayudo di su fildeo. Mester bisa cu e pitchernan Shawn Duinkerk, kende a habri e wega y Abarham Taveraz, kende a bin releva, a haci un trabou sublime ariba monticulo, silenciando e bateadornan di Puerto Rico totalmente. Den bom di e 1inning, Aruba cu base yen, ta haci un cos ora cu  Juan Moncion ta dal hit pa right, aki Milton Jr y Jandido ta drenta pa e 2 - 0, Aruba, Ariba. Den inningnan number 2 y 3 nada no ta pasa cu caminda ningun di e dos equiponan no ta anota, pero si ta laga varios coredor ariba base, sigur Aruba cu ta haya e chens di habri e wega for di otro, pero no ta probecha. Den di 4inning, Aruba ta pone un homber na base, pa medio di Jandido Tromp cu Raypatrick Didder na bate, aki e hoben Didder ta pone e stadion bira cabez abou ora cu e ta dal un batazo profundo di leftfield y ta mira esaki pasa over di e muraya. Wel ta aki ta caminda bo por a mira cuanto hende tabatin paden y pafor di e stadion aki, un cabal y desordo di otro mundo na unda henter e flur di e parke a keda tembla, Aruba ta bai ariba 4 - 0. Den di 5inning, Puerto Rico ta menaza y ta logra anota su prome careda pa e 4 - 1, pero den e bom di e mesun 5inning aki, Aruba ta bolbe anota un careda pa e 5 - 1. Den e di 6inning, ningun di dos ta haci algo. Den e di 7inning y e ultimo chens pa Puerto Rico nan ta anota 1 careda pa e 5 - 2, pero esey tabata tur, paso pitcher Shawn Duinkerk ta lamper e cuarto bate di Puerto Rico cu tres bala di candela(bola de fuego), anto sigui cu a pone e glove di catcher Chadwick Tromp hera pega candela. Aruba 1 ta gana e titulo Latino Americano di baseball Senior League pa di dos anja consecutivo, anto invicto cu 7 wega gana y cero perdi, sin permiti mucho careda. Anja tambe e equipo di Aruba a titula campeon invicto, pues cu ta suma e total na 14 wega gana y 0 perdi. Ki record!! Pabien Aruba, boso a logra, un biaha mas. Up to Bangor, Maine for the baseball Senior League World Series!