Algo masha peculiar ta loke nos a mira den e seleccion di Aruba 1 cu a caba di titula campeon den baseball Latino Americano. E laso familiar den e seleccion tabata algo mas cu bisto. Tata cu yui y dos ruman haci e seleccion aki uno extra special. Nos por a mira e dos rumannan Chadwick y Jandido Tromp, kendenan a forma parti di e seleccion aki, uno como catcher y e otro como segunda base como tambe outfielder. Di otro banda e laso di tata cu yui tabata tey presente, nos por a mira coachnan Milton Croes y su yui Milton Croes Jr, como tambe coach Rayborn Didder y su yui Raypatrick Didder. Momento sigur emocional pa tur presente, tabata ora cu Raypatrick a dal e homerun, tabata bisto cu su tata Rayborn, e momento ey como coach na tercera base, no por a domina su lagrimanan y emocionnan, claro kiko bo por haci ora bo yui ta dal un homerun asina importante den un campeonato di taya manera e Latino Americano, anto cu abo ariba tereno ta coach, mas orguyoso bo no por ta, kizas Rayborn a mira su mes tempo e tabatin e edad di Raypatrick. Mescos ta conta tambe pa Milton, e dia cu su yui Milton Jr ta dal e homerun contra di Colombia. Por ultimo nos por a mira Manager Greg Manuela y su yui Jermain Manuela, kende den outfield tabata e pieza clave den e defensa di Aruba 1. Esaki sigur no ta algo cu bo ta mira tur ora, kizas e influencia di ta cerca di otro e momento ey, tambe a hunga un rol importante, sigur como tata. Despues di a mira bo cuminsa bati y catch su promer bala cu 4 anja y awor diez pico anja despues, mire ta gana un titulo Latino Americano, anto den bo presencia ta algo mas cu special of no?Ta conta tambe naturalmente pa e dos rumannan Tromp, nan tata sigur por ta orguyoso di nan. E potretnan so ta bisa mil y un palabra.