Si tin algo extra cu un deporte mester pa e funciona manera debe ser, ta su publico. Sin fanatico no tin deporte, sin deporte no tin fanatico. E campeonato di baseball Latino Americano aki mester bai duna un extra motivacion y empuhe na e baseball di Aruba, pero manera nan ta bisa na ingles 'time will tell'. Pero un cos ta sigur, e fanaircada di Aruba cu a baha masal y respalda e weganan di baseball ta uno cu pa masha anja nos no a mira. Presente den e stadion di Nadi Croes/Crismo Angela diasabra anochi, un ril ta coi e curpa ora bo mira e ola humano of wave di e fanaticada casi tur bisti cu e colornan di nos bandera, pa no papia mes di e ambiente pafor di e stadion. E ta ponebo pensa; 'Ki dushi e ta pa ser un Arubiano'. Ora di e homerun di Raypartick Didder y sigur na e ultimo out di pitcher Duinkerk, un awa na wowo e momento ey ta na su lugar. Un pabien na henter e fanaticada di baseball cu a bini na tur e weganan tanto na Dragon Hitters y Nadi Croes/Crismo Angela Ballpark. E fanatico sigur tabata e di 10 hungador ariba tereno, un hungador cu kizas ariba tereno no tey, pero den secreto e tabatin e influencia di mas grandi, ariba e wega.Pabien Aruba, nos a logre un biaha mas.