Cu solamente cuater careda ricibi durante di henter e campeonato y un monton anota cu tur hende a perde conteo, nos muchanan di Aruba 1, representa pa North/South League a sa na bai cu e titulo maximo di baseball Latino Americano Senior Division aki na Aruba. Pa un siman largo nos a disfruta di un campeonato cu tabatin Aruba completo den su gara, mirando cu tur dia e stadion di Winston awor mihor conoci como Nadi Croes/Crismo Angela Ballpark tabata chikito pa acomoda tur e hendenan cu a bin mira baseball, specialmente e dos equiponan di Aruba. Pafor di e stadion tabata reina un ambiente familiar, hasta a ser bisa cu pafor tabatin mas ambiente cu paden, enfin un fiesta completo ta loke nos a biba pa un siman largo. Tur presente na e wega final, mester por a sinti di ta orgoyoso di por a nace ariba e pida baranca aki, e color blou di nos bandera a resalta ayera enorme. Despues di 35 anja, Aruba a titula campeon ariba "homesoil", pues na cas, algo cu hopi no a spera di por a ripiti y esnan cu a biba esaki a forma parti di un historia nobo. Mas cu claro cu pa e muchanan di senior, esaki ta un back to back championship den e campeonato Latino Americano, mirando cu anja pasa Aruba a bai cu e titulo maximo, pero gana na Panama. Aruba su baseball tin dos anja ta domina den latinamerica, pues cu nos por, claro ata e muestra, ta e boluntad di tur mester tey pa nos demostra esaki. Un pabien na e organisadornan di e evento, casi sigur Aruba lo por host un otro evento Latino Americano, anto pronto, kizas otro anja caba. By the way, den final Puerto Rico a ser derota cu e score di 5 - 2. Mas despues nos lo tin e numeritonan di e wega final como tambe mas potret.