Diahuebs ultimo San Nicolas Taekwondo Center bou guia di Master Eric Barry a tene un campeonato pa tur su miembronan net despues cu scolnan local a cera nan portanan cu a carga e nomber di Afterschool Championship. E campeonato a bay entre tur e alumnonan di San Nicolas Taekwondo Center. A yama dos miembro di Brazil Taekwondo Stichting pa asina asisti na e campeonato. Master Eric Barry a para refree na unda cu e la aplica tur e reglanan International mirando cu Master Eric Barry ta un refree international y a biaha awe pa e weganan di Del Caribe na Puerto Rico na unda e lo bay fungi como refree y e la train bon den su mesun scol di Taekwondo prome cu e la bay Puerto Rico. Prome a duna les normal na unda cu tur hende a warm up haciendo varios ehercicio, manera scopmento ariba e cusinchinan pa despues bay bringa ariba e cancha di combate. A pone e muchanan den categoria di edad y haltura pa asina por tin bon combate entre nan. Den e chikitonan tawata tin basta pelea na unda cu nan tawata kere cu ta den cancha di pelea di berdad nan tawata aden. Dustin Perez tawata tin su mannan yen yen, pasobra tur tawata kier un pida di dje. Dustin Perez a gana su prome pelea cu un score di 8-3. Den final Dustin Perez no tawata por mas, ganando un pelea 5-3 ta bin ta perde esaki 7-6 den e ultimo rond. Parce cu gasolin a caba cu Dustin  Perez. Carlos Perez tata di Dustin Perez tambe a forma su mes den e les nan di San Nicolas Taekwondo Center na unda cu e tambe a drenta e arena di combate. Aki por a mira cu Carlos tata y yiunan ta ariba e mesun caminda, tanto Carlos, Carito y Dustin Perez tur tin e talento den nan na unda cu back kick ta nan forma favorito di scop. Aki Carlos a pone Richie sinta un rato dor di su back kick. Shurendly Powell ta demonstrando dia pa dia cu e ta un hoben cu futuro sigur sigur. San Nicolas Taekwondo Center ta na caminda di ta top. Awor aki Shurendly Powell ta bay na un camp training na Miami pa un siman pa despues bin bek pa sigiu prepara su mes pa Costa Rica. E campeonato top ta esun di e Best of the Best Maltin Polar Taekwondo Cup. San Nicolas Taekwondo Center tin tur e campeonatonan nan dilanti na pecho, nos mes ta organisando nos campeonato na December na unda cu nos kier ta mas fuerte ainda. San Nicolas Taekwondo Center no ta bay cu vakantie pasobra Master Eric Barry ta bayendo Costa Rica pa e Costa Rica Open cu ta un campeonato di rango, na unda cu ta hanja punto ariba nivel mundial. Aki bo ta topa e mihornan di mundo ta bin participa pa mantene nan puntaucion. San Nicolas Taekwondo Center a recuada fondo den forma di pone actividadnan, manera nos a caba di tin un fundraising na unda cu nos tawata tin un cuminda crioyo tambe nos kier a gradici nos comision di mayornan cu a yuda pa asina e por tawata un exito. Nos portanan ta habri pa un y tur cu kier forma parti di nos team di San Nicolas Taekwondo Center. Nos ta duna les di Taekwondo tur Dialuna, Diaranson y Diahuebs for di 6'or di atardi te cu 8'or di anochi pa chikito te cu grandi. Un bon ehempel ta e famia Perez, na unda cu tata y yiunan ta train Taekwondo cerca nos na Abraham de Veer School.  Nos kier a gradici Brazil Taekwondo Stichting pa nan cooperacion den e evenemento aki.