E campeonato di baseball Latino Americano ta jegando su recta final na unda e equiponan di Aruba 1, Puerto Rico, Corsow y Panama mester a enfrenta otro den e weganan semi-final. E prome wega di e atardi a bai entre e fuerte equipo di Puerto Rico, kende a termina invicto den su poule contra di e equipo di Panama, cu a sali cu un derota contra Aruba, pero despues ta recupera bon eliminando Venezuela, un di e faboritonan pa hopi. Mester bisa cu den un bon wega yena cu tension, e muchanan di Puerto Rico ta gana esnan di Panama cu e score hopi preta di 2 - 1 y asina ta clasifica pa e gran final di diasabra. Despues a sigui e candeloso encuentro entre Aruba 1 y Corsow, cu a haya un bye-run den e serie aki, mirando cu Aruba 2 ta gana di Sto Domingo, pero tur dos ta keda elimina y Corsow ta clasifica. Mester bisa cu e duelo aki tabata uno di pitcheo, cu Matos grandi ariba monticulo y Jandido Tromp e homber clave den bateo. Di otro banda mester bisa cu e pitchernan di Corsow a tira un bon wega limitando e bateadornan temible di Aruba 1cu durante di henter e serie aki a bati bon. Un homerun di Jandido Tromp den inning number 3 ta duna Aruba 1 un ventaha solido di 3 - 0.  Asina e wega a keda bai cu Aruba 1 en basando coredor na varios ocasion pero no por a habri e wega for di otro. Na e ultimo out, e alegria tabata inmenso cerca e hungador y sigur e fanaticada cu a baha masal pa parke di baseball Nadi Croes/Crismo Angela. Diasabra atardi pa 5or nos lo haya e partido pa e di 3 y 4 lugar entre Corsow contra Panama y despues pa 7.30 nos lo haya e gran final den baseball Latino Americano entre Aruba 1 y Puerto Rico. Un invitacion cordial ta bai pa henter Aruba pa bini Sta Cruz y apoya nos muchanan.