E biahe di e antorcha Olimpico hubenil a inicia awe na Olympia, Grecia, cu sendemento di e candela durante un ceremonia oficial pafo di e famoso Tempel di Hera. Usando e rayonan di solo y un spiel cóncavo, un religiosa sagrado a sende e candela prome cu esaki a drenta e stadion Olimpico Antiguo y a wordo pasa pa e antorcha di e prome cargador di e antorcha, Apostolos Koutavas, un atleta cu lo representa Grecia den e deporte di trampoline durante e Weganan Olimpico Hubenil (Youth Olympic Games). Den e 22 dianan cu falta pa e prome edicion di e Weganan Olimpico Hubenil na Singapore, mas o menos 2.400 cargador di antorcha lo hiba e candela na tur cinco continente den un biahe diseña pa promove e balornan Olimpico di excelencia, amistad y respet bou di hubentud rond mundo. E biahe di e Antorcha Olimpico Hubenil, bou guia di e Comite Organizador di weganan diSingapore, lo yega e ciudad di Berlin riba 24 di juli, moviendo pa Dakar (26 juli), Mexico City (30 juli), Auckland (1 augustus) y Seoul (4 augustus). Un relevo di antorcha di seis dia cuminsando 5 di augustus ta programa pa yega e destinacion final Singapore, caminda cu e Weganan Olimpico Hubenil ta tuma lugar di 14 pa 26 di augustus proximo. “E ta un momento orguyoso y special pa por a mira e Antorcha Olimpico Hubenil wordo sendi pa prome biaha,” Presidente di Comite Olimpico Internacional Jacques Rogge a bisa. “Nos speranza ta pa hobennan rond mundo sinti e espirito di e Youth Olympic Games, symboliza den e biahe di e antorcha y cu nan lo brasa e mensahe di excelencia, amistad y respet.” Presente na e ceremonia di sendemento di candela tabata e Presidente di e Comtie Organizador Singapore 2010 Ser Miang Ng, Presidente di e Comision di Coordinacion di IOC pa e prome Weganan Olimpico Hubenil Sergey Bubka, Presidente di Comité Olimpico Griego Spyros Capralos, Embahadora di e Weganan Olimpia Hubenil Yelena Isinbaeva, y otro invitadonan. “Ta un honor di mira e nacimento di un iniciativa nobo pa hobennan,” señor Ng a bisa. “Aunque cu e ceremonia di sendemento di candela ta data bek mas cu 2.000 aña, e balornan Olimpico di excelencia, amistad y respet cu e candela ta representa ainda ta mes relevante awendia. “Nos ta spera cu e biahe di e Antorcha Olimpico Hubenil lo conecta hendenan hoben rond mundo cu e Movimento Olimpico, y inspira nan pa biba segun e balornan aki.  Y nos ta ansioso pa yama henter mundo bonbini na Singapore na augustus pa e prome edicion di e Youth Olympic Games.” E Antorcha Olimpico Hubenil lo wordo usa pa sende e pebetero pa duna inicio na e weganan dia 14 di augustus proximo. E Weganan Olimpico Hubenil ta habri pa participantenan entre 14 y 18 aña di edad. Pa Aruba ta participa cuatro atleta: Saskia Postma y Joey Ponson di e deporte di landamento, Nicole van der Velden den vela y Brandon Arends den e deporte di judo. Como Hefe di Mision di e delegacion Arubano COA a nombra Bryan Lopez.