Tin un famoso dicho ta bisa; 'Tanten cu anochi no sera, careda di bina no a caba', esaki ta pas cu e equipo di Gazelles. Despues di tabata 2 - 0 atras den e serie final, awo cosnan a bira hot, paso e ta 2 - 2 y diabierna un berdadero tabla lo bula den Sporthal, ora cu e dos equiponan aki topa otro pa e wega final final. Diaranzon anochi, e di cuater partido di e serie final den volleyball Dama A-klas entre YMCA y Gazelles a tuma lugar den e Centro Deportivo Betico Croes na Sta Cruz. Diadomingo anochi, e equipo di Gazelles a bini bon bek den e serie ganando YMCA den un thriller di wega, e setnan a caba 3 - 2 na fabor di Gazelles. Awe diaranzon e muchanan di YMCA, guia dor di coach Phercy Phelipa a bini cu otro intencion, esta di coi campeon. Den e prome set nan no ta haci wega y rapidamente nan ta gana esaki cu e score di 25 - 17. Den e segundo set e score a bai hopi pareu, dado momento e tabata tabla 10 - 10, pero desde aki ta caminda e damanan di YMCA ta bai laga y ariba 16 - 12, pero Gazelles no ta rindi y ta bini bek pa 16 - 16, hasta tuma e reyenda y bai ariba 21 - 17, por ultimo finalisa e set 25 - 21. Den e di tercer set,  YMCA ta cuminsa bon y ta bai ariba cu diferencia di ocho punto, pero un biaha mas Gazelles di coach Igmar Ohenia forza y ta sera e gap y bolter e score na 16  - 14. Ta bon pa bisa cu e capitan Jacky Tousant tabata pone block fuerte pa e muchanan di YMCA cu no por a sali, tres error costoso tras di otro ta pone YMCA bai na 17 - 16, hasta te 23 - 19, mas cu claro nan ta finalisa esaki na nan fabor ganando e tercer set 25 - 19. Nos tin cu menciona cu na dos ocasion, e juez di linea, Halman ta canta call robez den e desventaha di Gazelles, unda por a wak claramente cu a bala ta cai pafor di linea. Den set number cuater e emocionnan a subi formal, na unda e wega a bira hot, hot, sigur na final. E score tabata bai 'om en om', un biaha YMCA ta bai dilanti, e otro biaha Gazelles ta pone e score na nan fabor, pues un set hopi pareu. Na e score 12 - 12, e wega a cuminsa bira uno caminda e condicion fisico y e concentracion a bira vital, YMCA a probecha bon di esaki y ta pika dilanti 15 - 12, aki di biaha coach Ohenia ta pidi time-out pa brake e running di YMCA y cu exito, paso Gazelles ta bini bek pa empata na diezcinco cu un lamper di smash pa e capitan Jacky Tousant y hasta bai ariba 16 - 15. Dado momento Gazelles ta duna comando y ta bai ariba 20 - 18, pero YMCA ta pone presion y forza Gazelles haci fout, na 22 - 18, coach Phelipa ta pidi time-out, aki ta caminda cu YMCA ta haya manera un bida, pero envano paso Gazelles ta wanta duro y ta gana e set preta 25 - 23. E ultimo set a bira uno caminda e nerviosismo a hunga un rol grandi, e publico a cuminsa apoya y mete den e wega, esaki a hasta traha ariba e nervio di e coach di Gazelles. Rapidamente Charlotte Heemstad ta smash e prome punto pa YMCA cu ta bai ariba 4 - 2, pero Gazelles un biaha mas ta bini bek pa e 4 - 4 te na 13 - 8, e ultimo punto cu tremendo smash di capitan Tousant. E ultimo dos puntonan, pa e 15 - 8 tabata un cuestion di formalidad. Mester bisa cu e cansancio a hunga un rol sigur den e ultimo dos setnan cerca e muchanan di YMCA, nan a keda cansa y agota, mucho no a ser logra, manera tabata e caso den e prome tres setnan, aki YMCA tabata mas dominante, pero set cuater y cinco tabata, "all about Gazelles". Ban wak kiko lo bai pasa diabierna awor, ora lo bira probablemente 7.30 di anochi. So be There!!!!