Anja pasa tabata e muchanan di EPB - Hato cu a ser derota den e wega final, e anja aki Colegio Arubano Oranjestad ta esnan cu mester a keda conforme cu e titulo di sub-campeon. E mucha hombernan di EPB Pariba, bou guia di jufrouw Noortje Derksen y meneer Raynold Hughes a sa na conquista e "back to back title" den softbol escolar pa scolnan avansa despues di a derota Colegio Arubano Oranjestad cu e score di 7 - 5, den un tremendo wega. Despues di a hunga un wega al estilo 'thriller' den e wega di semi-final contra di e finalistanan di anja pasa esta EPB - Hato, na unda a ser gana den e ultimo turno na bate, e muchanan di EPB Pariba a bolbe haya e opotunidad di demostra pakiko nan ta e berdadero campeonnan. Mester bisa cu Colegio Arubano a cuminsa e partido bon cu dos homerun concecta, rapidamente nan tabata den un ventaha comodo di 4 - 1. Pero despues poco poco e muchanan di EPB Pariba a start e motor y cuminsa anota nan respectivo caredanan na unda nan ta tuma e ventaha di 7 - 5 den e ultimo inning, pero Colegio Arubano mester a bini na bate ainda y aki ta caminda cu e muchanan di EPB Pariba a dal porta sera y saca Colegio pa e di tres out, pa asina seya e victoria y nan di dos titulo tras di otro. E victoria aki ta duna e muchanan di EPB Pariba e derecho di representa Aruba den e interinsulaire schoolsportwedstrijden e dianan 26-27-28 maart na nos hermana isla di Boneiro. Un pabien na EPB Pariba cu nan di dos titulo como tambe na Colegio Arubano Oranjestad cu nan titulo di sub-campeon Un danki special ta bai na Esther y Nicole de Vries pa e bunita potretnan