Pregunta clave di e siman nobo aki ta; 'Kiko ta pasando cu RCA'? Ta parce cu nada no kier logra den e equipo, e segunda buelta aki. Un serie di weganan empata y perdi ta pone cu RCA a logra masha tiki punto den 5 wega hunga. E tricolornan tin mas wega empata e campeonato aki cu cualkier otro equipo cu un total di seis wega. Pa stranjo cu e por zona, asina mes nan ta na di segundo lugar ariba e tabla di posicion. E futbol di RCA no a mustra progreso of kizas consistencia manera den e prome buelta. Diadomingo ultimo contra di e ultimo lugar esta Brazil Jrs un biaha mas cosnan ta bai completamente robez. Un avalancha di oportunidadnan di gol a ser benta afor y ta mira Brazil Jrs bini bek bon den e wega y empata esaki. RCA tog ta logra habro e marcador den e prome tempo ora cu e defensa Charles Krijt ta anota na di 37 minut pa asina RCA pika dilanti 1 - 0. Cu un defensa ta anota pa RCA ta bisa tur cos di e linea di delanteria di e tricolornan di Solito, kendenan a lubida ta con ta anota gol of kiko kiermen anota gol. Un producion di hungadornan cu den e prome buelta a sa na anota hopi gol, pero den e segunda buelta aki nada no kier logra. Den e segundo tempo tampoco RCA no por a finalisa e partido, pero si ta mira Brazil Jrs bini bek den e wega ora cu Luis Carlos Croes ta empata sorpresivamente y ta iguala e wega 1 - 1. Ni kiko RCA a haci nada no tabata drenta, e drama a bira mas grandi ainda ora cu e anotado di gol esta Krijt ta mira su di dos carchi gel ser saca den su direccion y mester a bandona e partido, esaki sinta ariba banki, pues e frustracion tabata bisto cerca e tricolornan. Pa Brazil Jrs esaki tabata un punto sumamente valios paso awor nan tin nuebe punto y ta igual cu Riverplate ariba e tabla di posicion. Pa loke ta RCA, nan tin 24 punto pero manera nos a bin ta remarca, e otro equiponan ta ganando nan respectivo weganan y ta den 'overdrive' biniendo duro, mientras e muchanan di RCA, tin e pia ariba 'brake' y tin cu cuminsa na primi trot prome cu ta lat.