Diadomingo atardi e dos equiponan Estrella y Dakota a enfrenta otro den un encuentro di hopi importancia pa ambos equipo mirando e tabla di posicion. E naranjadanan di Sta Cruz hunto cu Deportivo Nacional ta e revelacionnan den e segunda buelta aki, mientras e amariyonan tampoco no ta haciendo mal papel, mirando nan un victoria y dos empate den nan ultimo tres weganan. Un Estrella cu 16 punto tratando na keda den e race, pa asina tog busca un manera pa e clasificacion y un Dakota cu 13 punto, kier hala lue di hunga weganan di promocion/degradacion. Nos a mira un Dakota cu den e prome tempo a cuminsa hunga bon, ya na di dos minut di e partido, e medio campista Manny Ridderbos a haya un tremendo oportunidad, pero ta mira su bala dal den e lata sali afor. Asina mes Dakota ta habri e marcador ora cu e defensa George Tromp ta lora un bala dilantio gol y e biaha aki si Ridderbos ta pone su cabez na esaki y ta bati portero Randall Oduber pa e 1  0 pa Dakota.  Mester bisa cu Dakota tabatin e mihor di e wega sigur den e minutnan inicial. Do otro banda tin cu bisa cu Estrella a cuminsa poco slow, e wega no tabat bai manera desea, mucho bala largo ta ser hunga lubidando e medio campo por completo. Asina mes den un tremendo hugada di toke, Alex Conceicao ta pasa e bala pa e alero Anuar Kock, kende sin ningun problema ta empata e partido na uno, esaki na di 24 minut cu un bon tiro den skina drechi. Despues di e gol, Estrella a manera haya un bida, mientras Dakota a cai atras y no por a sali dilanti, den un bon hugada combinacion entre Ikel, Alex y Power Ranger, e ultimo aki ta haye su so cu e portero Koolman di Dakota y cu un bon tiro den skina drechi e ta deposita e bala pa e 2 - 1 na fabor di e equipo di Estrella. E gol a cai net den 45 minut, pues mucho mas no a pasa den e prome tempo. Segundo tempo Den e segundo tempo nos por a mira un Estrella determina, nan a sali rapidamente pa busca e gol di amplia e marcador, ya na di 51 minut nan ta bai ariba 3 - 1 den e marcador ora cu den un pifia entre e defensa Koen y Robert di Dakota, e delantero Alex Conceicao ta haya e bala regala for di Koen, aki sin basila e ta manda esaki den gol y asina Estrella ta bai comadamente dilanti. Mester bisa cu despues di e gol aki e muchanan di Dakota a cai completamente den otro, nada no tabat logra mas, ni kiko nan a haci e wega simplemente no tabata bai mas. Di otro banda pa Estrella e wega a bira uno di formalidad, na unda nan tabata mucho mas mihor cu den e prome tempo, den un centro di Ikel Lopez na di 61 minut, e bala ta cai den net despues cu portero Shamuel Koolman ta purba di manda esaki afor pero ta pusha e bala den nobenta di e skina drechi y asina e wega ta bira 4 - 1 na fabor di Estrella. Mas y mas e wega ta sigui Estrella ta haya su oportunidadnan di anota mas gol, na di 75 minut Miguel Guttierez ta anota e 5 - 1, ora cu den un bunita cruse di Ikel Lopez e ta contra esaki cu canti pia manda den gol. Cu e victoria aki, Estrella ta para firme na 22 punto y tur cos ta mustra cu den nan proximo wega contra di Brityannia nan lo ta conta cu Bruno Conceicao, kende ta yegando Aruba otro siman y join e naranjadanan di Sta Cruz, cu no ta haci wega den e di dos buelta aki. Ban mira kiko ta bai pasa. Di otro banda e amariyonan di Dakota ta keda pega na 13punto y e muchanan di Beeldsnijder tin cu mira kiko ta pasa den e weganan restante, mirando cu hunga promocion/degradacion lo por ta un posibilidad.