Dia 24 di januari 2010 a tuma lugar den Cristal Theather e entrega di Certificado y faha preto di 1er Dan na 6 alumno di Gihae Tang Soo Do Studio Aruba. Alaves tambe e entrega di Certificado di 2do Dan na Jamison Kock y 3er Dan na Melissa Noguera. Instuctora Melissa Noguera durante un clinica di Masters na Argentina na luna di December 2009 a pasa su examen pa su 3er Dan y durante e bishita di Master Wifredo Burgos na Aruba na luna di Januari ultimo a ricibi su Certificado pa 3er Dan y awor su titulo ta cambia di Kyo Sah Nim pa Bo Sah bo Nim Melissa Noguera. Melissa a ricibi un invitacion special di Grandmaster Shin, pa aunque cu Melissa no ta un Master ainda pa por atende un Masters Clinic na Argentina y na unda e mester a pasa su examen pa 3er Dan. Pabien Melissa cu bo logro grandi di parti henter bestuur di Gihae Tang Soo Do Assosacion. Tambe Melissa a ricibi for di man di Master Burgos un plakaat di Comendacion di World Tang Soo Do Association. Esaki ta di dos cu e ta ricibi caba. Jamison Kock cu a pasa su examen na luna di oktober 2009 cu exito na Puerto Rico, tambe mester a warda te ora cu Master Burgos ta na Aruba pa por ricibi su Certificado di 2do Dan, cual tambe a tuma lugar e dia aki. E 6 alumnonan cu a ricibi na 1er Dan a pasa nan examen na luna di juni 2009, durante e weekend di torneo di Tang Soo Do. Nan ta: Ashton Boekhoudt, Jesulie de Cuba, Lidbert Thielman, Marelvia Erasmus, Tamara Angela y Marilyn Prins. Pa e anochi aki tawata presente algun invitado special cu ta Minister di Salubridad y Deporte Sr. Dr. Richard Visser, Parlamentaria Clarisca Velasquez, voorzitter di subsidie commissie sra. Sue-Ann, voorzitter di ASU, sr. G. Franca, representante di Renaissance Resort y representante di Debby Doo Peuterschool na unda Melissa ta duna les tambe y tambe mayornan y invitado di e alumnonan cu a ricibi nan Certificado. A cuminsa cu himno di Aruba canta pa nos alumna Jovanka Martis y despues esun di World Tang Soo canta na Papiamento pa e mes tambe. Maestra di ceremonia tawata na encargo di sra. Dalia Maduro. Despues a hiba palabra Melissa Noguera gradiciendo tur esnan cu a juda. Tambe a duna algun palabra Master Burgos, Minister di Salubridad y Deporte Sr. Dr. Richard Visser, Parlamentaria Clarisca Velasquez y tambe e representante di Debby Doo Peuterschool. A sigui cu show di alumnonan di Gihae Tang Soo Do, mustrando tur loke nan a siña den turn an trayectoria, cu ta sparring di Little Dragon, Sparring di alumno mas grandi, show di arma y kibramento di palo. Despues a pasa un DVD di tur e trayectoria di Gihae Tang Soo Do Studio Aruba for di tempo cu nan a cuminsa na 2001 te cu awor, usando video y potretnan. Tawatin hopi harimento y joramento di e DVD aki. Melissa a hasi entrega di algun certificado di appreciacion pa tur nan aporte durante tur e añanan cu a pasa, cu tawata Rennaisance Resort, Amsterdam Manor (Sra. Selva van Schaijk), Tropical Bottling Co., Sr Gerardo de Veer, Sra. Millie Hernandez pa e vertaling di e himno di Tang Soo Do, Caribbean Mercantile Bank y Subway. Un danki di curason pa tur boso aporte durante tur e añanan cu a pasa. Despues di un pause a sigui cu e entrega official di faha y Certificadonan. Tambe manera ta un exigencia di World Tang Soo Do Association, e alumnonan cu a ricibi nan 1er Dan mester a hasi nan promesa cu nan lo keda semper loyal na e organisacion mundial aki. Bestuur di Gihae Tang Soo Do kier a felicita tur nos Black Beltnan y desea nan tur exito den futuro y cu sigur lo boso merese tur respet como un bon Black Belt. Tang Soo!!