Ministro di Deporte, Dr. Richard Visser, a reuni cu Directiva Diario di Comité Olímpico Arubano recientemente pa atende diferente tema di común interés y proyectonan cu ambos ta desea di mira realisa den e periodo nos dilanti. Mientras cu Minister Visser tabata acompaña pa su consehera riba tereno di deporte, sra. Sue Ann Leong, di parti di COA tabata presente Presidente Roy Mezas, Tesorero Edwin Roos y Secretaria General Nicole Hoevertsz. E reunión tabata uno hopi positivo y a toca diferente tema, manera entre otro e tareanan di COA; e necesidad y deseo pa yega na un maneho nacional di deporte, pa cua pronto lo instituí e Conseho Nacional di Deporte y Movecion; preparación di atletanan en general y specificamente pa e weganan cu lo tuma lugar durante aña 2010; e sistema di evaluación y selección di atletanan; e creación di un maneho pa un grupo di atletanan hoben pa futuro; maneho di subsidio; y e importancia pa tin un dialogo habri entre Minister y COA. Na final di e reunión a palabra cu lo tene otro debidamente informa y cu lo sigui traha conhuntamente, loke ta beneficioso pa deporte di nos país.