Bou guía di Presidente di Comision Medico di COA, Dr. Sandy Roga y e equipo di comision, a tuma lugar diasabra mainta e prueba medico di e atletanan cu ta preparando pa competi den e Weganan Suramericano (ODESUR) y e Weganan Centro Americano y del Caribe (CAC). Meta di e pruebanan aki ta pa midi e estado físico cu e atletanan ta aden y pa mira si nan ta den un bon estado di salud participa na eventonan deportivo di e nivel aki. Actualmente tin varios federación entrenando pa e Weganan ODESUR, cu ta e prome evento riba e calendario e aña aki. Directiva mientrastanto a dicidi di manda un delegación chikito, pero consistiendo di un total di no mas cu 30 atleta den seis deporte, cu ta un di esunnan mas chikito cu COA a yega di manda pa Weganan ODESUR. E Direccion Tecnico a guía e proceso di preparación di e atletanan durante dos aña, después cu cada un di e Federacionnan a entrega e base di nan preparación, esta un plan di entrenamento. Director Tecnico, Edmundo Josiah ta comenta: “Mi ta hopi satisfecho con e proceso a bai. En berdad nos tin un selección mas chikito cu na ocasionnan anterior, pero mi tin confianza cu cada un di nan a cumpli cu nos exigencianan y ta bon prepara.” Hefe di Mision, Juelle Those, a participa algún siman pasa na e seminario di hefenan di misión pa e Weganan Suramericano na Medellin. E ta supervisando e proceso administrativo y organizatorio cu mester percura pa e delegación yega Medellin bon. Durante e simannan nos dilanti, COA lo manda mas información tocante e delegación cu finalmente lo representa nos país. E Weganan ODESUR ta tuma lugar na Medellin, Colombia, for di 19 te cu 30 di maart proximo. Un total di 15 pais suramericano ta participa na e evento aki cu ta tuma lugar cada 4 aña.