Diaranzon 3 di februari 2010 Arubaanse Voetbal Bond a manda un invitacion pa tur su clubnan miembro di AVB, sea via e-mail, via fax, via telefoon of a entrega e carta di invitacion personalmente, cu diasabra, 20 februari proximo pa 2:00 pm na Technical Center Angel Botta lo tin un reunion extraordinario.  Ta asina cu den e reunion general di 16 december ultimo a keda palabra cu lo yama un reunion extraordinario pa asina aki e presupuesto pa aña 2010 wordo presenta y aproba.  Tambe lo mester tuma lugar nombramiento di 3 miembro nobo pa comision di apelacion y pues tambe ta haci un peticion na tur clubnan miembro cu si acaso nan tin personanan cu por forma parti di dicho comision, pa entrega nomber lo mas pronto cu ta posibel na bestuur, den e caso aki serca e secretario general, sr. Randolf Lacle.  Ta claro cu lo tin diferente participacion di parti di bestuur y sigur lo tin oportunidad di haya turno liber, prome cu finaliza e reunion.  Si acaso pa 2:00 pm no tin quorum, lo sera e reunion y habri’e bek pa 2:30 pm y e reunion lo bay door cu of sin quorum y tur decision tuma durante e reunion lo ta valido.  AVB ta haci un peticion na tur su clubnan miembro pa asisti y aporta na bienestar di nos deporte futbol, tambe lo duna algun informacion y sigur tin e oportunidad di combersa cu miembronan di bestuur y otro clubnan miembro di AVB.  Sperando di por topa cu tur nos clubnan miembro, diasabra 20 di februari proximo, nos ta termina.