Den nos programa radial di tur diasabra esta Real Sports presenta pa Real FM 90.7, Sport Tv Aruba y Bon Dia Aruba, nos a elabora ariba un topico masha interesante. E topico tabata e acuerdo cu Gobierno di Aruba a cera cu club profesional di futbol hulandes, Sparta Rotterdam. Como invitadoan special nos tabatin awe sra. Nicole Hoevertsz y sr. Rudy Dirksz. Prome sra. Hoevertsz a elabora ariba henter e convenio cu Gobierno di Aruba a cera cu e club hulandes Sparta na unda Aruba den su totalidad lo por sali benificia di esaki, no solamente e deporte pero tambe a menciona e parti di sciencia cu Erasmus Universiteit y comercio cu e Waf di Rotterdam. ta mas cu obvio cu e deporte tin su lugar den e acuedro aki manera cu pa e proximo temporada e nomber Aruba lo ta ariba e shirt di Sparta parti dilanti y patras, tambe lo laga nos hungadornan cu ta sobresali haci try-out na e club di Sparta, entrensdornan lo bin duna clinica na nos dirigentenan. Pa e luna di mei, Sparta lo bini un trainingskamp na Aruba caminda lo duna mira su nos futbolistanan hoben y nan coachnan por forma parti di e kamp aki. Den su calidad como entrenador di futbol, sr. Rudy Dirksz tambe a trece algun punto interesante padilanti. Segun sr. Dirksz, AVB ta hunga un rol importante den henter e structura cu Sparta lo ta treciendo Aruba, AVB mester lanta un comision cu lo encarga su mes cu e parti di futbol infantil y hubenil, e comision aki lo evalua e hungadornan ariba e diferente aspectonan y lo duna cuenta na AVB con e hungadornan ta desaroyando nan mes y den ki forma. AVB mester pone e importancia pa busca hendenan cualifica pa haci y realisa e trabou aki y Lifida no ta esnan cu lo por maneha esaki, debi cu trabounan asina ta mucho mas cu solamente hunga futbol, e ta exihi un structura mucho mas amplio y un cambio di mentalidad cu vision pa futuro. Den nos edicion di dialuna nos lo tin un entrevista cu sr. Rudy Dirksz ariba su pensamento ariba e projecto, pais Aruba y Sparta. Mester bisa tambe cu e futbolistanan militando den Sparta Rotterdam esta Eric y David Abdul a jama den nos programa radial Real Sports na unda nan a expresa di ta masha contento cu Aruba lo por haya e oportunidad aki cu Sparta y cu e hungadornan di Aruba mester probecha awor cu e caminda a habri futbolisticamente. Tambe colega Jan Poets di Real FM a jama un rato y papia di e tempo di Frank Rijkaard cu tambe tabatin e mesun deseo pa Aruba. Conclusion di henter e entrevista awemainta ta, cu si no tin un bon structura, un bon disciplina y union di tur cu lo traha den e projecto aki, nos tin wel di lubida, e projecto lo ta un fracaso. Nos  di Sport Tv Aruba lo sigui e desaroyo di e projecto di cerca.